Það kárnaði gamanið hjá ungmennum í gærkvöld þegar lögreglan kíkti á vettvang
Lögreglan á höfuðborgarsvæðinu lokaði skemmtistað í miðbæ Reykjavíkur í nótt í kjölfar vettvangsferðar lögreglu skömmu eftir miðnætti. Á umræddum stað mun hafa verið mikill fjöldi ósjálfráða ungmenna við drykkju. Þetta kemur fram í dagbók lögreglu.
Menntaskóli á svæðinu stóð fyrir bjórkvöldi á skemmtistaðnum. Lögreglunni barst ábending og gerði í kjölfarið út nokkra menn á svæðið. Við nánari athugun fundu þeir út að á fjórða tug gesta staðarains væru undir 18 ára aldri, og sumir svo ungir sem 16 ára.
Þá stöðvaði lögregla sjö ökumenn víðsvegar um höfuðborgarsvæðið í nótt sem grunaðir eru um að hafa verið undir vímuáhrifum við aksturinn. Voru þeir færðir til sýnatöku á lögreglustöð en sleppt að því loknu.
Einn aðili var handtekinn skömmu eftir klukkan 4 í nótt og færður í fangaklefa vegna gruns um heimilisofbeldi.
Lögreglan einnig kölluð nokkrum sinnum til vegna minniháttar mála tengdum vímuástandi.