Íbúar í Reykjanesbæ, Landvernd og Náttúruverndarsamtök Suðvesturlands standa fyrir kærunni
Útgáfa starfsleyfis fyrir kísilmálmverksmiðju Thorsil í Helguvík hefur verið kærð en ekki er langt síðan Umhverfisstofnun gaf það út. Úrskurðarnefnd umhverfis- og auðlindamála barst kæran í gær en greint er frá málinu á vef Víkurfrétta.
Telur kæran alls 13 blaðsíður þar sem fram kemur rökstuðningur ásamt fylgiskjölum en í þeim eru reifaðir margvíslegir vankantar á útgáfu leyfisins. Telja kæruaðilar meðal annars að Umhverfisstofnun hafi vanrækt rannsókn á heildaráhrifum mengunar sem af verksmiðjunni mun stafa auk þess sem skort hafi á rannsókn á samlegðaráhrifum loftmengunar fyrir bæði kísilmálmverksmiðju Thorsil og kísilmálmverksmiðju United Silicon.
Þá telja þeir einnig að Umhverfisstofnun hafi ekki uppfyllt rannsóknarskyldu sína og yfirsést að öll mál, sem falla undir mat á umhverfisáhrifum, eru á borði leyfisveitandans.
Þá benda kæruaðilar einnig á ýmis atriði sem bendi til vanhæfis Umhverfisstofnunar í málinu. Það er álit kærenda, að fyrir hendi séu þær aðstæður, sem eru fallnar til þess að draga óhlutdrægni stofnunarinnar og starfsmanna hennar í efa með réttu.
Á vef Víkurfrétta segir einnig að Umhverfisstofnun hafi gefið út starfsleyfi fyrir verksmiðjuna í byrjun febrúar síðastliðnum en fyrra starfsleyfið var gefið út í september á síðasta ári. Það var kært til Úrskurðarnefndar umhverfis- og auðlindamála og afturkallað í kjölfarið vegna formgalla.