Tæplega sextugur leigusali sem gekk í gildru DV í október þegar hann bauð ungri konu í örvæntingarfullri leit að húsnæði lægra leiguverð gegn því að hann fengi að stunda með henni kynlíf er loks búinn að leigja út húsið sitt.

Konan sem var til umfjöllunar í DV var á hrakhólum og neyðarkallinu svaraði maður sem átti fallegt hús í Hafnarfirði. Fljótlega bauð maðurinn konunni lægra leiguverð gegn kynlífi. Þá hefur DV undir höndum upptökur af ósiðsamlegu tilboði mannsins. Samkvæmt heimildum DV hefur maðurinn nú leigt út hús sitt og mun íslensk fjölskylda setjast þar að.

Maðurinn var verulega ósáttur við umfjöllunina og kærði DV til siðanefndar. Siðanefnd kvað upp úrskurð nú fyrir skömmu og vann DV málið.