„Við mæðgur lentum í heldur betur erfiðri lífsreynslu seinnipartinn í gær.“ Þetta segir Inga Marín Björgvinsdóttir en hún og dætur hennar þrjár urðu vitni að alvarlegu bílslysi á Reykjanesbrautinni. Sjö ára dóttir Ingu kom manninum sem lenti í slysinu til bjargar með því að vita upp á hár hvar sjúkrakassinn í bílnum þeirra var geymdur. Því var hægt að veita fyrstu hjálp á vettvangi.

Bíllinn illa farinn

Mæðgurnar, sem eru búsettar í Grindavík, voru á leið í afmælisveislu á höfuðborgarsvæðinu þegar slysið varð á Reykjanesbraut við Ásvelli í Hafnarfirði.

Hetja dagsins Þessi hugrakka stúlka kann svo sannarlega að bregðast við erfiðum aðstæðum

„Við þurftum skyndilega að hægja á okkur frekar hratt. Ég náði því auðveldlega en maðurinn í bílnum fyrir aftan mig sá það of seint. Í staðinn fyrir að dúndra aftan á mig ákvað hann að reyna að bjarga sér með því að keyra fram úr mér. Það tókst ekki og bílinn valt 3 til 4 veltur út af veginum, niður hlíð og endaði á milli tveggja risastórra steina,“ segir Inga og bætir við.

„Ég hringdi strax í 112 en á þessum tímapunkti var ég viss um að hann væri dáinn. Þetta var svo harkalegt og bíllinn í klessu.“ Þegar Inga steig út úr bílnum voru nokkrir aðrir vegfarendur komnir að bifreiðinni sem valt. „Einn fór strax í að reyna að ná manninum út.“

Tæpum 10 mínútum síðar voru tveir lögreglubílar, þrír sjúkrabílar og tækjabíll komnir á vettvang en klippa þurfti manninn, sem var með meðvitund, gat hreyft hendur og var með höfuðáverka sem blæddi mikið úr, út úr bílnum.

Inga segir í samtali við DV að lögreglan hafi svo hringt í sig í gærkvöldi og látið hana vita að maðurinn hafi verið ótrúlega heppinn. „Hann er lemstraður og með skurði en óbrotinn. Þvílík heppni. Það er alveg klárt mál að beltið bjargaði lífi hans.“ Hún segir að það hafi verið mjög gott að fá þetta símtal bæði fyrir hana sjálfa sem og stelpurnar sem voru mjög skelkaðar eftir þessa erfiðu lífsreynslu.

Systurnar Emma 12 ára, Kristjana 8 ára og Svala 6 ára. Þær voru mjög skelkaðar eftir lífsreynsluna.

Fann sjúkrakassann

Áður en lögreglu og sjúkralið bar að garði var manninum veitt fyrsta hjálp á vettvangi.

„Í bílnum okkar var sjúkrakassi sem ég hafði aldrei hugsað út í og vissi ekkert hvar var. Kristjana vissi þó nákvæmlega hvar hann var geymdur þegar einn mannanna kom hlaupandi að bílnum og spurði stelpurnar hvort þær vissu um kassann.“

Kristjana, sem beið inni í bíl ásamt systrum sínum, var mjög yfirveguð við þessar átakanlegu aðstæður og rétti manninum kassann sem innihélt allt það sem þurfti til að stöðva blæðinguna á höfði þess slasaða.

„Svona sjúkrakassi er nauðsynlegur í alla bíla. Maður veit aldrei hvenær maður þarf á honum að halda.“