Khizr Khan, faðir bandarísks hermanns sem féll í Írak árið 2004, lét Donald Trump, forsetaframbjóðanda Repúblikanaflokksins, heyra það á flokksþingi Demókrataflokksins sem fór fram í vikunni. Sonur Khizr, Humayun Khan, lést þegar bílsprengja sprakk í Baghdad.

Khan yngri var múslimi, fæddur í Sameinuðu arabísku furstadæmunum en bandarískur ríkisborgari. Hann fór fyrir hópi bandarískra hermanna einn örlagaríkan dag árið 2004. Hermennirnir komu auga á dularfulla bifreið og skipaði Khan yngri kollegum sínum að doka við meðan hann skoðaði bifreiðina. Það var þá sem ósköpin dundu yfir og bifreiðin sprakk í loft upp.

Sem kunnugt er hefur Donald Trump verið harðorður í garð múslima í kosningabaráttu sinni og látið hafa eftir sér að öllum múslimum verði bannað að koma til Bandaríkjanna.

Í ræðu sinni á flokksþingi Demókrataflokksins sagði Khizr að Hillary Clinton, sem var útnefnd sem frambjóðandi Demókrataflokksins á flokksþinginu, hefði rétt fyrir sér þegar hún sagði að Khan yngri hefði verið eitt það besta við Bandaríkin. „Ef það væri fyrir Donald Trump hefði sonur minn aldrei getað komið til Bandaríkjanna. Donald Trump gerir út á að óhreinka orðspor allra múslima. Hann lítillækkar einnig aðra minnihlutahópa og talar niður til kvenna.“

Khizr beindi orðum sínum svo beint að Donald Trump og sagði: „Hveurðu einhverntímann lesið bandarísku stjórnarskrána? Ég skal lána þér mitt eintak. Leitaðu að orðinu „frelsi“. Hefurðu komið í Arlington-kirkjugarðinn? Farðu og skoðaðu grafir þeirra hugrökku hermanna sem hafa dáið við að verja landið okkar. Þú hefur ekki fórnað neinu. Við leysum engan vanda með því að byggja múra. Við erum miklu sterkari saman og munum verða enn sterkari með Hillary Clinton sem forseta.“

Ræða Khan vakti hrifningu margra, jafnvel fulltrúa Repúblikanaflokksins. John Noonan, fyrrverandi ráðgjafi Jeb Bush og Mitt Romney, tók undir það á Twitter-síðu sinni að Khan hefði gert meira fyrir Bandaríkin en Donald Trump.