„Þetta eru svo svakalegar og kræfar ásakanir“ – Vefsíðan Sandkassinn lögð niður
„Nú er mér nóg boðið, ég sit ekki undir þessu lengur. Þegar það er búið að setja mig númer 10 á lista yfir nýrasista, þá sit ég ekki undir því,“ segir Vigdís Hauksdóttir þingmaður Framsóknarflokksins í samtali við Eyjuna en hún hefur lagt hefur fram kæru á hendur Gunnari Waage, ritstjóra vefsíðunnar Sandkassans vegna ærumeiðandi ummæla og skrifa á síðunni. Búið er leggja vefsíðuna niður en líkt og Pressan greindi frá í morgun hyggst Gústaf Níelsson einnig leggja fram kæru á hendur síðunni.
Eyjan greinir frá því að Sandkassinn hefur tekið saman lista yfir það sem ritstjórn hans kallar „íslenska nýrasista“: einstaklingar sem eru eru „andvígir því að fólki af öðru þjóðerni sé veittur ríkisborgararéttur eða að þeir hafi rétt á stuðningi frá félagslega kerfinu“. Á síðu Sandkassans eru eftirfarandi ummæli höfð um svokallaða nýrasista:
„Hér eru listaðir þeir menn og konur sem eru áberandi í umræðum á opinberum vettvangi, gegna ábyrgðarstöðum, háir jafnt sem lágir, sem eiga það sameiginlegt að beita sér af mikilli hörku í garð fjölmenningar á Íslandi. Margir þeirra afneita tilvist fjölmenningar hér á landi alfarið.
Það er ekki nokkur leið að komast á þennan lista fyrir slysni. Það er ekki nóg að missa einu sinni út úr sér eitthvað og vinna sér inn greininguna nýrasisti. Til þess þarf einbeittan áróður gegn fólki á grundvelli þjóðernis, litarháttar eða uppruna yfir talsvert tímabil. Þeir sem hér eru, eru persónur sem rekið hafa slíkan áróður yfir langt tímabil.“
Auk Vigdísar, sem er í 10.sæti listans og Gústaf Níelsson, má finna á listanum Davíð Oddsson, Ásmund Friðriksson, Arnþrúði Karlsdóttur Guðna Ágústsson og Sveinbjörgu Birnu Sveinbjörnsdóttur.
Vigdís greindi frá því á fésbókarsíðu sinni fyrr í dag að „teningunum væri kastað“ og að eftir rúmlega sjö ára níðskrif um hana á netinu hefði hún gengið á fund lögreglunnar. Málið færi nú í ferli. Þá segir Vigdís í samtali við Vísi að þessi tiltekna kæra beinist aðeins að Sandkassanum og ritstjóra þeirrar síðu, Gunnari Waage.
„Þetta eru svo svakalegar og kræfar ásakanir að ég sá mér ekki annað fært en að taka málið alla leið. Og hef ég þurft að þola ýmislegt undanfarin sjö ár,“ segir Vigdís jafnframt í samtali við Eyjuna.