Í dag stíga sex karlar, Haraldur, Halldór, Guðni, Sveinn Rúnar, Ólafur Helgi og Ingólfur fram í Helgarblaði DV. Blaðið er helgað þolendum kynferðisofbeldis og Druslugöngunni.

Fötluð kona, Íva Marín, segir frá mikilvægi þess að horfa á fjölbreytileika en ekki afbrigðileika. Hún minnir okkur á að þrjár af hverjum fjórum fötluðum konum verða fyrir kynferðisofbeldi einhvern tíma um ævina.

„Þurfum að takast á við ranghugmyndirnar,“ segir Hjálmar Gunnar Sigmarsson hjá Stígamótum en þar hefur hann starfað frá árinu 2014.

„Með þeirra hjálp varð ég að sigurvegara ekki fórnarlambi,“ segir Guðni.

„Það skiptir máli að allir komi fram og ræði um kynferðisofbeldi,“ segir Sveinn Rúnar.

Stígamót minna okkur líka á að við þurfum að takast á við ranghugmyndir okkar um kynferðisofbeldi og leita okkur hjálpar þegar við erum tilbúin til þess. Í blaðinu má einnig finna upplýsingar um það hvert þolendur geta leitað ef þeir þurfa á aðstoð að halda.

„Lít á sársauka sem góðan í eðli sínu,“ segir Ingólfur sem hefur skrifað bók um erfiða reynslu en sigur sinn.

„Maður þarf bara að vera rosalega sterkur og ekki láta árásarmanninn vinna þó að nauðgunin eigi sér stað, þá getur maður farið í meðvirkni með honum,“ segir Ólafur sem fékk hjálp hjá Stígamótum.

„Þöggun um kynferðisofbeldi hefur ýmis skaðleg áhrif á þolendur og samfélagið allt,“ segir Halldór Auðar borgarfulltrúi.

„Ég er að mörgu leyti frjáls frá þessu. Ég er ekki reiður yfir minni reynslu, ég vorkenni ofbeldismanninum,“ segir Haraldur sem opnar á reynslu sína í fyrsta sinn.

Druslugangan fer fram á morgun klukkan 14.