Aðalheiður Erla Davíðsdóttir sem nú gengur í gegnum erfiðustu og sárustu reynslu lífs síns samþykkti að sonur hennar, Aron Hlynur yrði líffæragjafi. Það gerði hún í byrjun mánaðarins eftir að ljóst var að hann myndi ekki lifa af heilablæðingu.
Aron Hlynur var aðeins fjögurra ára þegar hann lést. Var hann jarðaður í Lindarkirkju á fimmtudaginn. Fjögurra ára stúlka fékk hjarta Arons og þá munu aðrir fá lifur, bris og nýru drengsins. Fréttatíminn greinir frá.
Sjá nánar: synjað um útfararstyrk
DV fjallaði um Aðalheiði og Aron á fimmtudaginn. Vakti fréttin mikla athygli og voru margir ósáttir hvernig komið var fram við móðurina. Aðalheiður er öryrki og glímdi Aron við flogaveiki. Í ljós kom að hann reyndist vera með Lennox-Gastaut heilkenni sem er mjög sjaldgæfur sjúkdómur og lýsir sér í illvígum krömpum. Sótti Aðalheiður um útfararstyrk hjá Kópavogsbæ en var synjað þar sem tekjur hennar þóttu of háar, þrátt fyrir að lifa á skertum bótum. Vegna örorku gat Aðalheiður ekki sótt um styrk í lífeyrisfélag. Tölvan í Kópavogi sagði einfaldlega NEI.
„Það kom hingað teymi frá Svíþjóð,“ segir Stella Leifsdóttir, amma Arons, en hún greindi frá gjöf Aðalheiðar og Arons í samtali við Fréttatímann. Gjöf sem nú hefur bjargað lífi lítillar stúlku í Svíþjóð.