Þyrluslys skammt frá Bergen í Noregi
Óttast er að allir sem voru um borð í þyrlu sem brotlenti skammt frá Bergen í Noregi í morgun séu látnir. Slysið varð rétt fyrir hádegi að norskum tíma og voru þrettán um borð, tveir flugmenn og ellefu farþegar.
Slysið varð skammt frá eyjunni Torøy, en þyrlan var að flytja starfsmenn frá olíuborpalli Statoil í Norðursjó upp á meginlandið.
Mikinn reyk lagði frá flaki þyrlunnar og voru allir tiltækir viðbragðsaðilar í nágrenninu kallaðir á vettvang. Rebecca Anderson, íbúi á svæðinu sem varð vitni að slysinu, segir við Verdens Gang að sprenging hafi orðið þegar vélin brotlenti.
Þyrlan var á vegum olíufyrirtækisins Statoil og gáfu forsvarsmenn fyrirtækisins út yfirlýsingu þess efnis að allar þyrlur fyrirtækisins, sömu gerðar og sú sem brotlenti, hefðu verið kyrrsettar í kjölfar slyssins.