Morðtíðni í El Salvador er ein sú hæsta í heimi
Yfirvöld í El Salvador eru búin að fá sig fullsödd af ótrúlegri öldu morða og glæpa sem riðið hafa yfir þetta tæplega sjö milljóna íbúa land í Mið-Ameríku. Morðtíðni er ein sú hæsta í heiminum í El Salvador, en á síðasta ári voru rúmlega 104 manns myrtir fyrir hverja hundrað þúsund íbúa.
Ástæða þessara öldu morða sem riðið hefur yfir í El Salvador má að stóru leyti rekja til glæpagengja sem meðal annars berjast um völdin á fíkniefnamarkaðnum í landinu.
„Nú er kominn tími til að binda endi á þetta ofbeldi,“ sagði Oscar Ortiz, varaforseti El Salvador, þegar hann tilkynnti að stofnuð hefði verið sérstök deild innan hersins sem á berjast gegn glæpagengjum á götum El Salvador. Þúsund manns munu skipa þessa deild og verður þeirra hlutverk meðal annars að hafa hendur í hári leiðtoga glæpagengjanna sem taldir eru halda sig á strjálbýlum svæðum El Salvador.
Tvö stærstu og fjölmennustu gengin í landinu hafa lengi eldað grátt silfur, Mara Salvatrucha, eða MS 13 og Barrio 18, eða 18th Street Gang. Gengin voru stofnuð á níunda áratug liðinnar aldar í kjölfar borgarastyrjaldarinnar í landinu. Fjölmargir Salvadorar flúðu landið og fluttu til Bandaríkjanna þar sem umrædd gengi voru stofnuð.
Í fyrstu var markmiðið ekki ekki að stunda glæpastarfsemi, þvert á móti var markmiðið að veita Salvadorum sem voru nýkomnir til Bandaríkjanna vernd. Meðlimir MS 13 og Barrio 18 leiddust hins vegar margir af réttri braut og komust í kast við lögin. Fjölmargir voru sendir aftur til El Salvador þegar friður komst á í landinu, en þar héldu þeir áfram að feta glæpabrautina og safna nýjum meðlimum í gengin.
Á þeim 30 árum sem gengin hafa verið starfandi hefur meðlimum fjölgað margfalt og telja nú tugþúsundir. Gengin eru með útibú um víða veröld og eru enn með mikil ítök í Bandaríkjunum til að mynda.
Samið var um vopnahlé milli gengjanna árið 2012 en það var ekki langlíft og fyrr en varði fór allt í bál og brand aftur. Yfirvöld reyndu að stemma stigu við ofbeldisöldunni, meðal annars með því að skilgreina gengin sem hryðjuverkasamtök sem færði lögreglu auknar heimildir í baráttu sinni. Margir efast um að hin nýstofnaða deild elítuhermanna muni gagnast í baráttunni gegn gengjunum. „Í stað þess að leysa vandamálið er verið að hella olíu á eldinn,“ segir Raúl Mijango sem vann meðal annars að því að koma vopnahléi á milli samtakanna árið 2012.