Nærri ári eftir að fyrstu smit Zika-veirunnar greindust í Brasilíu þá hafa yfir 50 Bandaríkjamenn greinst með veiruna og hefur hún þegar fundist í Puerto Rico. Er því búist við að veiran muni finnast í Bandaríkjunum í sumar. „Þetta er eins og að búa sig undir fellibyl. Þú veist að hann er á leiðinni, en þú veist ekki hvar hann kemur á land,“ sagði Dennis Moore yfirmaður flugnavarna í Pasco-sýslu í Flórída í samtali við New York Times.

Zika-veiran veldur sem kunnugt fæðingargöllum ásamt ýmsum göllum í taugakerfinu og berst með moskítóflugum sem fyrirfinnast sem betur fer ekki hér á landi. Vandinn er sá að Aedes aegypti, flugnategundin sem ber vírusinn er nánast ónæm gegn stórúðunum flugaeiturs sem þýðir að til þess að koma í veg fyrir smit þarf að fara í hvern einasta bakgarð til að úða. Þetta er hægara sagt en gert í landi á borð við Bandaríkin þar sem mörgum er meinilla við að útsendarar ríkisins séu að skoða garðinn sinn.

„Þessi skæruhernaður gegn moskítóflugum er mjög nýr af nálinni og ég er ekki viss um að margir staðir séu tilbúnir fyrir slíka starfsemi,“ sagði Michael Doyle yfirmaður flugnavarna í syðsta hluta Flórída. Að nota flugvélar til að dreifa flugnaeitri „er eins og að berjast við Al Qaeda með venjulegum her,“ sagði Doyle við NY Times.

Obama Bandaríkjaforseti tilkynnti í vikunni að hann hygðist óska eftir 1,8 milljörðum bandaríkjadala til að berjast gegn Zika-veirunni, fyrsta skrefið yrði að kortleggja nákvæmlega hvar veiran er stödd til að hægt sé að koma í veg fyrir frekari útbreiðslu.