Hvatningarverðlaun Öryrkjabandalags Íslands voru veitt í tíunda sinn við hátíðlega athöfn í Hörpu í gær, á alþjóðadegi fatlaðs fólks. Verðlaunin voru veitt í þremur flokkum og handhafar verðlaunanna að þessu sinni voru:

Í flokki einstaklinga. Friðrik Sigurðsson, fyrrverandi framkvæmdastjóri Þroskahjálpar, fyrir störf sín í þágu fólks með þroskahömlun og aðstandenda þeirra.

Í flokki fyrirtækja/stofnanna. Dagsól ehf./verslunin Next, fyrir metnaðarfulla starfsmannastefnu sem felur meðal annars í sér að ráða fólk með skerta starfsgetu.

Í flokki umfjöllunar/kynningar. Tabú, fyrir fræðslu og markvissa umfjöllun um stöðu fatlaðs fólks í samfélaginu.

Einnig voru afhentir styrkir til íþróttafólks sem keppti á Ólypíumóti fatlaðra í Brasilíu í september. Hver Ólympíufari fékk 200.000 krónur í styrk frá Öryrkjabandalaginu. Þeir sem hlutu styrk voru Helgi Sveinsson spjótkastari, Jón Margeir Sverrisson sundmaður, Sonja Sigurðardóttir sundkona, Thelma Björg Björnsdóttir sundkona og Þorsteinn Halldórsson bogfimimaður.