Spiderman: Homecoming komin í bíó
Spider-Man, ein af ofurhetjum Marvel Comics, birtist nú enn á ný á hvíta tjaldinu í Spiderman: Homecoming.
Það voru þeir Stan Lee og Steve Ditko sem sköpuðu Spider-Man sem birtist fyrst í teiknimyndasögu árið 1962. Eftirspurn eftir teiknimyndasögum fyrir unglinga olli því að Stan Lee fór að velta fyrir sér hugmyndum að nýrri ofurhetju sem unglingar gætu tengt við. Karakterinn Richard Wentworth, sem bar viðurnefnið The Spider, þegar hann barðist við glæpamenn í samnefndum blöðum var aðalinnblásturinn í að Stan Lee ákvað að stofna karakter sem bar nafnið Spider-Man, eða Kóngulóarmaðurinn. Nafnið Spider-boy, eða Kóngulóardrengurinn, kom ekki til greina að mati Lee, þar sem hann sá fyrir sér að karakterinn myndi þróast úr unglingsdreng í karlmann, auk þess sem drengur myndi draga úr vigt hans í samanburði við aðrar ofurhetjur.
Í sköpun þeirra Lee og Ditko er ofurhetjan, Peter Parker, munaðarlaus unglingur sem elst upp hjá May frænku og Ben frænda í New York og eins og aðrir unglingar þarf hann að kljást við þau hefðbundnu vandamál sem því fylgir að vaxa og þroskast, auk þess að kljást við ýmsa erkióvini og glæpamenn í gervi Spider-Man.
Með sköpun Spider-Man var brotið blað hvað ofurhetjur varðar þar sem unglingur var í fyrsta sinn í hlutverki aðalhetjunnar. Hann hafði heldur engan sér eldri til að kenna honum á kosti og galla þess að vera ofurhetja, líkt og til að mynda Batman hafði, og þurfti því að reka sig á og læra sjálfur.
Í fjölmörgum teiknimyndasögum Marvel þróaðist Spider-Man úr feimnum unglingsdreng í New York yfir í atvinnuljósmyndara. Upp úr 2010 varð hann síðan einn meðlima Avengers, ofurhetjuteymis Marvel. Hliðarsögur um Spider-Man hafa einnig verið gefnar út, eins og til dæmis Ultimate Spider-Man, sem fjallar um ævintýri Peter Parker í hliðarheimi.
Spider-Man er flaggskip Marvel Comics og ein allra vinsælasta ofurhetja og teiknimyndakarakter allra tíma. Ásamt Batman og Superman, sem eru ofurhetjur DC Comics, er Spiderman frægasta ofurhetjan.
Spider-Man hefur birst í teiknimyndasögum, teiknimyndum, kvikmyndum, sjónvarpsþáttum, tölvuleikjum, litabókum, bókum, plötum og barnabókum.
Í sjónvarpi birtist hann fyrst í teiknimyndaseríunni Spider-Man á ABC sjónvarpsstöðinni á árunum 1967–1970, fleiri teiknimyndaseríur fylgdu í kjölfarið og síðan leikin sería, The Amazing Spider-Man, með Nicholas Hammond í aðalhlutverki sem sýnd var 1978–1979.
Spider-Man birtist fyrst í kvikmynd árið 2002 þegar Sam Raimi leikstýrði Tobey Maguire í aðalhlutverkinu í fyrstu mynd trílogíu, seinni myndirnar komu árin 2004 og 2007. Til stóð að gera eina mynd til viðbótar árið 2011, en Sony sló það af og ákvað að breyta um leikstjóra og leikara. Endurgerðin The Amazing Spider-Man með Andrew Garfield í hlutverki Spider-Man í leikstjórn Marc Webb var frumsýnd árið 2012 og mynd númer tvö árið 2014.
Sá nýjasti til að taka að sér hlutverk Spider-Man, Tom Holland, lék hann í kvikmyndinni Captain America: Civil War sem kom út árið 2016. Og nú er nýjasta myndin um Kóngulóarmanninn sjálfan, Spider-Man: Homecoming, komin út í leikstjórn Jon Watts og sú næsta er áætluð í júlí 2019.
Holland mun einnig endurtaka hlutverk sitt í Avengers: Infinity Wars sem frumsýnd verður árið 2018 og annarri Avengers-mynd sem enn hefur ekki hlotið nafn en er áætluð 2019.
Breski leikarinn Tom Holland er aðeins 21 árs, fæddur 1. júní 1996 í London. Hann byrjaði í hop hop danstímum, þar sem hann var uppgötvaður 10 ára gamall af Lynne Page sem sá um kóreógrafíu Billy Elliott söngleiksins. Eftir átta áheyrnarprufur og tveggja ára æfingar hóf hann að leika í söngleiknum og var þar næstu tvö ár.
Fyrsta kvikmyndahlutverk var í The Impossible þar sem hann lék á móti Naomi Watts og Ewan McGregor. Byggir myndin á sannri sögu fjölskyldu sem upplifði náttúruhamfarir þegar gríðarleg flóðbylgja skall á í Indlandi á jólum árið 2004, með þeim afleiðingum að 227 þúsund manns létu lífið. Holland hefur síðan leikið í myndum á borð við A Monster Calls og Captain America: Civil War (báðar 2016).
