Íslenska þjóðin hefur fylgst vel með bataferli Gylfa Þórs Sigurðssonar síðustu vikur en hann meiddist í mars.

Gylfi meiddist á hné og í fyrstu var óttast að hann gæti misst af Heimsmeistaramótinu í Frakklandi. Fljótlega bárust fréttir af því að Gylfi yrði klár í slaginn.

Endurhæfingin hefur þó tekið ögn meiri tíma en flestir höfðu talið. Hann hefur eytt síðustu dögum í Bandaríkjunum með sjúkraþjálfara með sér og segist vera á góðri leið.

„Það er búið að ganga vel síðustu tvær vikur. Það er enn nægur tími í mót þannig að við flýtum okkur hægt, við erum ekki að taka óþarfa sénsa,“ sagði Gylfi við íslenska fjölmiðla í dag.

Hann er að mæta á sína fyrstu landsliðsæfingu í dag og mun taka þátt í æfingunni að einhverju leyti.

„Ég mun eitthvað æfa með liðinu í dag, en ekki alveg á fullu. Ef það væri leikur í næstu viku þá myndi ég geta æft þannig séð. Það er spurning um að gera réttu hlutina nægilega mikið og vera ekki að reyna of mikið á þetta eða byrja of snemma. Hugurinn er búinn að róast, ég get allt sem ég þarf að gera. Ég er með það markmið að vera klár eftir einhverjar vikur þegar við erum mættir til Rússlands.“

Gylfi segir að hann hafi óttast það um tíma að missa af HM.

„Auðvitað fór það strax í gegnum kollinn á manni. Þetta var svolítið panik, sérstaklega daginn eftir meiðslin þegar ég gat ekki hreyft hnéð, þá var maður svolítið hræddur.“

Sjáðu viðtalið við Gylfa í heild hér að neðan.