Kjartan Henry Finnbogason mun ekki gleyma kvöldinu í kvöld bráðlega en hann lék með Horsens í Danmörku gegn Brondby.
Kjartan og félagar byrjuðu leikinn illa í kvöld og voru 2-0 undir eftir fyrri hálfleik á heimavelli.
Brondby er eitt allra stærsta lið Danmerkur og er liðið með 80 stig gegn aðeins 40 hjá Horsens eftir 35 leiki.
Kjartan kom inná sem varamaður á 84. mínútu leiksins og náði að tryggja sínum mönnum stig.
Kjartan minnkaði muninn fyrir Horsens á 89. mínútu leiksins og skoraði svo jöfnunarmark liðsins þegar sex mínútur voru komnar yfir venjulegan leiktíma.
Stórkostleg innkoma hjá íslenska framherjanum sem hefur skorað grimmt fyrir danska liðið.
