Umspilskeppnin í dönsku úrvalsdeildinni er í fullum gangi. Fyrirkomulagið er þannig að fjögur neðstu liðin eftir að deildarkeppni lýkur fara í umspil um það hvaða lið falla og hver halda sæti sínu.

Randers FC er eitt af þessum fjórum liðum en á milli stanganna þar stendur Hannes Þór Halldórsson, landsliðsmarkvörður Íslands. Í dag var fyrsti umspilsleikurinn þeirra. Þetta var útileikur gegn Helsingör og honum lauk með 1-1 jafntefli eftir ævintýralegar lokamínútur þar sem Hannes Þór varði vítaspyrnu á ögurstundu. Á þeim tímapunkti var staðan 1-0 fyrir Helsingör og það hefði verið ansi hátt fjall að klífa að fara inn í seinni leikinn þurfandi að vinna með þriggja marka mun til að eiga möguleika á að komast upp í umspilsúrslitaleikinn.

Mínútu eftir að Hannes varði vítaspyrnuna þá jafnaði Randers leikinn 1-1 og urðu það lokaúrslitin. Randers er því í góðri stöðu fyrir seinni leikinn sem fer fram á þeirra heimavelli næstkomandi sunnudag.

„Þessi úrslit eru gríðarlega þýðingarmikil. Að fara með útivallarmark með okkur inn í seinni leikinn er óskastaða og að hafa náð að snúa leiknum svona við undir lokin gefur okkur mikið sjálfstraust,“ segir Hannes Þór.

„Þegar vítaspyrnan var dæmd þá hugsaði ég með mér að núna væri komið að mér. Núna þyrfti ég að verja. Að það væri enginn annar valmöguleiki. Ég var eiginlega bara alveg viss um að ég myndi verja og það varð síðan raunin. Í næstu sókn jöfnum við svo leikinn. Við förum stoltir frá þessum leik og við verðum algjörlega klárir í slaginn næsta sunnudag,“ sagði markmaðurinn að lokum.