Félögin í Pepsi deild karla færðu bjórinn nær hinum almenna stuðningsmanni í fyrstu umferð deildarinnar. Á mörgum völlum mátti sjá bjór í stúkunni, hinn almenni stuðningsmaður getur nú verslað sér öl á sérstökum svæðum á völlum landsins.
Hingað til hefur bjórinn aðeins fengist í reykmettuðum bakherbergjum eins og góður maður orðaði hlutina.
Þessu fagnar Henry Birgir Gunnarsson, íþróttafréttamaður hjá Vísi og Stöð2 Sport.
,,Það sem er áberandi, félögin eru að færa bjórinn nær áhorfendum. Það er einhver mesti tvískinnungur að það sé ekki bjór á íþróttakappleikjum á Íslandi, það er búið að vera bjór alls staðar þar sem þú vilt í mörg ár,“ sagði Henry Birgir í hlaðvarpsþætti Vals sem Benedikt Bóas Hinriksson stýrir.
,,Hann hefur verið svolítið falinn og stundum bara fyrir útvalda, núna sjáum við bjórtjöld. Fjósið hjá Val, frábært og góð stemming. Það er verið að gera vel, mótið þarf þennan meðbyr. Svo þurfa þeir að glíma við HM þynnkuna, ef mótið er ekki meðbyr þegar farið er inn í HM þá verður mótið þungt.“
Liðin í deildinni eru öll að reyna að búa til frábæra stemmingu og það tókst í fyrstu umferð.
,,Það er létt typpakeppni á milli liðanna, hver sé að gera þetta best. Þarna er verið að ögra hefðunum og feluleiknum, svona á þetta að vera. Ef einhver ætlar sér að vera fullur á vellinum, þá´verður hann það. Sama hvort bjórtjaldið sé í fimm eða tíu metra fjarlægð eða fimm kílómetra fjarlægð. Það skiptir ekki neinu máli, með breyttum venjum og menningu. Meirihluti manna getur fengið sér 2-3 bjóra og farið svo heim. Þetta er glæsilegt.“
