Atletico Madrid tók á móti Arsenal í seinni leik liðanna í undanúrslitum Evrópudeildarinnar í kvöld en leiknum lauk með 1-0 sigri heimamanna.

Það var Diego Costa sem skoraði eina mark leiksins á 45. mínútu og lokatölur því 1-0 fyrir Atletico Madrid.

Fyrri leik liðanna lauk með 1-1 jafntefli sem þýðir að Atletico Madrid fer áfram í úrslitaleikinn en Arsenal er úr leik.

Arsene Wenger, stjóri Arsenal var svekktur með að tapa leiknum í kvöld.

„Þetta var svipað og fyrri leikurinn. Við vorum að koma okkur í góðar sóknarstöður en vorum ekki nógu beittir fyrir framan markið,“ sagði Wenger.

„Við vorum að spila gegn góðu liði og ég óska þeim alls hins besta í úrslitaleiknum en mér fannst við gera nóg til þess að fara áfram. Það voru nokkur mikilvæg augnablik í báðum leikjunum þar sem við stóðum okkur ekki nægilega vel og það varð okkur að falli.“

„Mér fannst við spila vel og það var ekkert að gerast þegar að þeir skora eftir skyndisókn. Þeir komu hræddir inn í leikinn, hræddir um að við myndum skora en þegar að þeir skora þá vörðust þeir vel og það kom meiri ró í þeirra leik.“

„Við töpuðum boltanum á hættulegum stað og það varð okkur einfaldlega að falli í kvöld,“ sagði Wenger að lokum.