Chelsea vann ótrúlegan 2-3 sigur á Southampton í ensku úrvalsdeildinni, um var að ræða fyrsta leik helgarinnar.

Það var Southampton sem tók forystuna í fyrri hálfleik þegar kantmaðurinn öflugi, Dusan Tadic kom heimamönnum yfir.

Það var svo Jan Bednarek sem kom Southampton í 2-0 eftir klukkutíma leik og ekkert benti til þess að Southampton myndi misa forskotið niður.

Chelsea sem hefur verið í tómu tjóni síðustu vikur kom hins vegar til baka og vann ótrúlegan sigur.

Það var Olivier Giroud sem lagaði stöðuna þegar tuttugu mínútur voru eftir af leiknum, framherjinn sem kom til Chelsea í janúar er duglegur að hrella markverði deildarinnar.

Southampton reyndi að verjast áhlaupum Chelsea en fimm mínútum eftir mark Giroud var komið að Eden Hazard. Hann jafnaði leikinn og leikmenn Southampton búnir að missa hausinn.

Það var svo á 79. mínútu eða níu mínútum eftir fyrra mark Giroud sem hann kom Chelsea í 2-3. Ótrúleg endurkoma hjá Chelsea sem á veika von á Meistaradeildarsæti.

Liðið er sjö stigum á eftir Liverpool en bæði hafa leikið 33 leiki og eiga eftir að mætast.