Íþróttaspekingurinn Mikael Nikulásson var gestur í Íþróttavikunni sem kemur út alla föstudaga á 433.is, Hringbraut.is og í Sjóvnarpi Símans. Helgi Fannar Sigurðsson og Hrafnkell Freyr Ágústsson hafa umsjón með þættinum.

Íslenska karlalandsliðið í handbolta hefur spilað fjóra leiki á EM til þessa, þrjá í riðlakeppni og einn í milliriðli. Gengið hefur almennt verið arfaslakt en liðið sýndi betri frammistöðu í naumu tapi gegn Þýskalandi í síðasta leik.

„Ég ætla að vera hreinskilinn, ég er ekki alveg að skilja þessa meðvirkni. Mér finnst Ísland vera betra handboltalið en Þýskaland. Þetta þýska lið er ekkert frábært og með minni breidd en Ísland,“ segir Mikael og hélt áfram.

„Þetta er Ísland í handbolta. Ef Frakkland í fótbolta tapar leikjum eru þeir ekkert ánægðir af því þeir börðust. Liðið var ekki frábært (á móti Þýskalandi), það voru 4-5 sem spiluðu frábærlega. 4-5 lykilmenn áttu hauskúpuleik í gær.“

Mikið var talað um það fyrir mót hvað íslenska liðið væri gott sóknarlega.

„Þetta er mjög skrýtið allt saman. Ég er búinn að horfa á marga leiki á þessu móti og mér finnst ekkert benda til þess að við séum eitthvað frábærir sóknarlega. Það eru allir að bíða eftir að við byrjum að spila eins og Snorri gerði með Val en þetta er svo langt frá því. Þetta er hægt, lítið um kerfi sem maður sér augljóslega og skotum fyrir undan. Þetta er hnoð og búið að lesa okkur fyrir löngu,“ segir Hrafnkell um málið.

Umræðan í heild er í spilaranum.