Spænski ökuþórinn Fernando Alonso slapp hreint ótrúlega vel eftir slys sem varð í Formúlu 1 kappakstri í Ástralíu í nótt.

Á 17 hring, eða þegar um einn þriðji var búinn af kappakstrinum, ók Alonson á eftir keppinaut sínum, Esteban Gutierrez. Þegar Alonso ætlaði að taka fram úr Gutierrez keyrði Alonson aftan á bifreið Gutierrez með þeim afleiðingum að hann lenti utan brautar. McLaren-bifreið Alonso valt tvisvar áður en hún stöðvaðist á hvolfi upp við vegg.

Kappaksturinn var stöðvaður vegna slyssins. Útlitið var hreint ekki bjart og óttuðust margir um Alonso. Spánverjinn reynist þó ómeiddur og gekk sjálfur í burtu frá slysstað. Hann staðfesti svo á Twitter síðar að læknar hefðu skoðað hann og staðfest að hann væri algjörlega ómeiddur.

„Ég er ánægður og heppinn að vera hérna. Þetta var ansi ógnvekjandi árekstur,“ sagði Alonso við fjölmiðla eftir kappaksturinn.

Það var svo Nico Rosberg á Mercedes sem sigraði kappaksturinn. Þetta er fjórði sigur Rosberg í röð. Næstur á eftir Rosberg kom Lewis Hamilton og í þriðja sæti var Sebastian Vettel.

Hér má sjá myndband af slysinu.