Margir grípa þá jafnvel eina gosdós (eða bjórdós) til að svala sér á ísköldum drykk. Án þess að hugsa neitt sérstaklega út í það taka fingurnir um opnarann á dósinni og opna hana án þess að líta neitt sérstaklega á opnarann sjálfan.
Eins og svo margt í umhverfinu okkar þá er opnarinn á dósunum afrakstur snilldarlegrar verkfræðihönnunar. Miðillinn Marieclaire skýrir frá þessu.
Málmhringurinn er hannaður þannig að hann hlífir fingrunum við að skerast. Hönnunin tryggir einnig að aflið dreifist jafnt þegar þú lyftir hringnum upp.
Síðan situr málmhringurinn fastur á dósinni sem kemur auðvitað í veg fyrir að hann endi sem rusl í náttúrunni.
Svo býr hringurinn á opnaranum yfir leyndri virkni, sérstaklega fyrir þá sem elska að nota sogrör.
Kolsýran gerir oft að verkum að sogrörið færist til og þrýstist upp og það getur auðvitað verið svolítið pirrandi.
Lausnin á þessu er innbyggð í hönnuninni á opnaranum. Það þarf bara að snúa opnaranum hálfan hring þannig að ysta gatið flútti við opið á dósinni, síðan er bara að stinga sogrörinu í gegnum gatið. Þá helst það á sínum stað, óháð því hversu mikið gos er í dósinni.
