Í Viktoríuvatni er klettaeyjan Migingo. Hún er á stærð við fótboltavöll en þrátt fyrir smæðina búa um 400 manns á henni.

Eyjan er nánast algjörlega þakin bárujárnsskúrum sem eru svo nærri hver öðrum að nánast hver einasti fersentimetri hefur verið lagður undir hús.

Ef íbúafjöldinn er umreiknaður yfir á ferkílómetra þá myndu 80.000 manns búa á hverjum ferkílómetra lands.

Ástæðan fyrir þessari þéttu búsetu er að í vatninu við eyjuna er mikið af Nílaraborrum sem er ein verðmætasta fisktegundin í vatninu. Sjómenn frá Úganda og Keníu hafa því komið sér fyrir á eyjunni því hún veitir góðan aðgang að fiskinum.

Þetta veldur pólitískum vanda því bæði Úganda og Kenía gera tilkall til eyjunnar og hafa deilt um hana árum saman.