Fjögurra ára drengur var fluttur á spítala eftir að hafa slasast í slysi í hoppukastala. Móðir drengsins, raunveruleikastjarnan Jess Wright, fjallaði ítarlega um atvikið á Instagramsíðu sinni, má segja að lýsingarnar séu átakanlegar foreldrum ungra barna sem finnst gaman að leika sér í slíkum tækjum.

„Presley flaug upp fyrir hoppikastalann og lenti á hörðu viðargólfi úr þriggja metra hæð. Þögnin sem sló veislugestina mun ásækja mig,“ segir Wright á Instagram. Sonur hennar átti erfitt með andardrátt í fyrstu og svo leið yfir hann.

„Við fórum á bláum ljósum á slysadeild í London og í sjúkrabílnum vorum við að tala um hluti eins og brotin rifbein, hryggjarskaða og jafnvel verra.“

Sonur hennar fékk að fara heim eftir nokkra klukkutíma á spítalanum og segir Wright að atvikið hafi skilið hana, sem og eiginmann hennar, í sárum. Þar að auki sé sonur hennar með hjartasjúkdóm og hafa þau hjónin fylgst vel með heilsu hans í gegnum tíðina. „Þetta var hræðilegt slys sem hefði ekki verið hægt að koma í veg fyrir en ég mun vera meira á varðbergi í framtíðinni ef hoppukastalinn er á viðargólfi en ekki á grasi eða mottu.“

Wright deildi svo fleiri myndum af syni sínum og skrifaði: „Hræðilegasti dagur lífs míns. Þakka guði fyrir að það sé í lagi með hann því það var hræðilegt að sjá hann svona.“ Þakkaði hún svo sjúkraflutningamönnum og starfsfólki Royal London Hospital.