Iðraólga (e. Irritable Bowel Syndrome) er samansafn mjög hvimleiðra og krónískra einkenna í meltingarvegi sem lýsa sér einkum í krömpum, vindgangi, uppþemdum kvið, hægðatregðu eða niðurgangi og óþægindum eftir máltíðir. Konur eru mun líklegri til að þjást af iðraólgu en karlar og ný rannsókn bendir til að eina helstu ástæðu þess sé einkum að finna í því sem er í meira magni í öllum konum, hormóninu estrógen.

Á vefnum Heilsuveru segir meðal annars um iðraólgu að hún eigi sér stað við truflun á starfsemi ristils og smáþarma á þann hátt að í stað þess að dragast reglubundið saman og flytja þannig fæðuna taktfast áfram þá verði samdrættir á mismunandi stöðum ristils og smáþarma samtímis. Þessar truflanir komi oftast í kjölfar máltíða.

Fjallað er um rannsóknina í tímariti Smithsonian-stofnunarinnar. Rannsóknin, sem gerð var á músum bendir til að estrógen komi sameindum sem valda sársauka í meltingarveginum af stað og geri ristilinn viðkvæmari fyrir vissum fæðutegundum.

Vonast er til að niðurstöðurnar ýti undir þróun meðferðarúrræða við iðraólgu og öðrum vandamálum í meltingarvegi.

Önnur þeirra sem fór fyrir rannsókninni, Holly Ingraham lífeðlisfræðingur við Háskólann í Kaliforníu, segir að skýringin á því af hverju konur sé líklegri en karlar til að þjást af iðraólgu sé nú fundin og það muni hjálpa til við lyfjaþróun í framtíðinni.

Samkvæmt niðurstöðum rannsóknarinnar reyndist estrógen vera mjög móttækilegt fyrir próteini í svokölluðum L-frumum sem munu vera sjaldgæfar frumur í meltingarveginum. Estrógenið veldur síðan því að umræddar frumur senda frá sér hormón sem sendir annari gerð af frumum í meltingarveginum skilaboð um að senda frá serótónín, sem sendir sársaukaboð til heilans.

Kollegar vísindamannanna sem stóðu að rannsókninni segja gildi hennar ekki síst felast í bættum skilningi á hvernig kyn getur haft áhrif á þann sársauka og vandamál sem geta skapast í líkamanum. Þessi bætti skilningur muni síðan skipta miklu máli við að að þróa betri leiðir til að takast á við allt slíkt.