Það sem gerðist eftir fundinn vakti þó mesta athygli: starfsmenn Kims tóku til við að hreinsa allt sem hann hafði snert af mikilli nákvæmni. Þeir þrifu meðal annars stólinn hans, borðið og fjarlægðu glasið sem hann drakk úr.
Reuters greinir frá þessu og vísar í myndband sem rússneski blaðamaðurinn Alexander Yunashev birti á Telegram. Þar sést hvernig tveir aðstoðarmenn Kims skrúbba bak og arma stólsins sem hann sat í, þurrka borðið og ganga þannig úr skugga um að engin ummerki væru eftir.
Sérfræðingar sem fréttastofan ræddi við segja að um sé að ræða hluta af ströngum öryggisráðstöfunum sem miða að því að koma í veg fyrir að erlendir njósnarar komist yfir viðkvæmar upplýsingar um heilsufar leiðtogans.
Japanska blaðið Nikkei hefur áður greint frá því að Kim taki eigið salerni með sér þegar hann ferðast utan landsins. Vísaði blaðið þar í heimildir frá japönskum og suðurkóreskum leyniþjónustum.
Michael Madden, sérfræðingur í málefnum Norður-Kóreu við Stimson-stofnunina í Bandaríkjunum, segir þessar ráðstafanir eiga rætur að rekja til valdatíma Kim Jong Il, föður Kims. Reglan sé að engin ummerki, hvorki hár né húðflögur, megi verða eftir – og jafnvel sígarettustubbar eru teknir með.
„Þetta er til að engin erlend leyniþjónusta, jafnvel vinveitt, geti komist yfir sýni og rannsakað það,“ segir Madden.
Í frétt Reuters er einnig rifjað upp að árið 2019, eftir leiðtogafund Kims með Donald Trump, þáverandi forseta Bandaríkjanna, hafi lífverðir hans lokað af hótelherbergið í Hanoi og þrifið það hátt og lágt í marga klukkutíma. Þá var meðal annars rúmdýna sem Kim svaf á fjarlægð og skipt út.
