Maður að nafni Sean Small sem er 84 ára gamall fannst látinn fyrir utan heimili sitt í bænum Newcastle á Norður-Írlandi um síðustu helgi. Lögreglan segir ljóst af verksummerkjum að Small hafi verið ráðinn bani og lýsir morðinu sem hrottalegu. Small hafði fyrr í sumar verið látinn laus úr fangelsi en hann hlaut dóm fyrir alls 10 kynferðisbrot þar á meðal gegn stúlku á táningsaldri.

Á blaðamannafundi norður-írsku lögreglunnar kom fram að Small hafði síðast sést á lífi fimm dögum áður en lík hans fannst.

Rannsóknarlögreglukonan Kerrie Foreman stýrir rannsókn málsins. Hún vildi lítið gefa upp um þá árás sem Small varð fyrir, hvenær talið er að hann hafi verið myrtur og hversu margir kunni að hafa tekið þátt í því. Foreman staðfesti þó að Small hefði orðið fyrir árás sem hefði verið hrottaleg.

Small sást síðast á lífi 19. ágúst síðastliðinn og Foreman óskaði á blaðamannafundinum eftir upplýsingum frá almenningi og þá til að mynda frá þeim sem voru í nágrenni heimilis hans þennan dag og gætu hugsanlega hafa séð eitthvað. Óskaði hún líka eftir ábendingum um fólk sem hefði sýnt af sér grunsamlega hegðun.

Kynferðisbrot á gamalsaldri

Fyrir tveimur árum var Small dæmdur fyrir alls 10 kynferðisbrot gegn annars vegar táningsstúlku og hins vegar ungri konu á árunum 2016-2018, þegar hann var áttræðisaldri. Hann játaði brot sín og hlaut því vægari dómi en ella en hann átti yfir höfði sér allt að 14 ára fangelsi. Vegna játningarinnar hlaut hann þriggja ára fangelsisdóm og átti síðan að vera á reynslulausn undir eftirliti í önnur þrjú ár. Hann var látinn laus úr fangelsi fyrr í sumar.

Foreman vildi engu svara um hvort morðið tengdist fyrri kynferðisbrotum Small með öðru en því að allir möguleikar væru til skoðunar. Lík Small er enn til rannsóknar en rúður voru brotnar á heimili hans skömmu eftir að hann sneri þangað aftur úr fangelsinu.