Fito er leiðtogi alræmdrar glæpaklíku, Los Choneros, en hann var dæmdur í 34 ára fangelsi árið 2011 fyrir fíkniefnasölu, morð og skipulagða glæpastarfsemi svo fátt eitt sé nefnt.
Þá er hann grunaður um að hafa lagt á ráðin um morðið á Fernando Villavicencio sem hugðist bjóða sig fram til forseta Ekvador. Flótti hans úr fangelsi í fyrra skapaði mikla ringulreið í Ekvador og varð meðal annars til þess að vopnaðir byssumenn ruddust inn í myndver sjónvarpsstöðvar og hótuðu öllu illu.
Hann var einnig eftirlýstur í Bandaríkjunum fyrir sölu og dreifingu á fíkniefnum og vopnasmygl og er klíkan hans talin hafa átt í nánu samstarfi við Sinaloa-gengið í Mexíkó.
Það fór ekki illa um hann í fangelsinu því hann lifði sannkölluðu VIP-lífi þar sem hann hafði aðgang að interneti, loftkælingu, dýrum húsgögnum og gat haldið veislur.
Honum tókst að flýja úr fangelsinu í janúar í fyrra en var sem fyrr segir handtekinn í glæsivillu sinni í heimabæ sínum Manta á miðvikudag. Þar hafði hann komið sér fyrir í sérútbúnu og vel földu rými undir eldhúsi hússins.
Í fréttum erlendra fjölmiðla kemur fram að þriggja ára dóttir glæpakóngsins hafi bent lögreglumönnum á felustað hans þegar þeir ruddust til inngöngu í húsið.
Daniel Noboa, forseti Ekvadors, segir að hann bíði nú eftir því að heyra í bandarískum yfirvöldum en taldar eru líkur á því að hann verði framseldur þangað. Fari svo á hann lífstíðardóm yfir höfði sér í Bandaríkjunum.
