Flugstjóri flugs 6764 frá IndiGo sendi út neyðarkall síðdegis á fimmtudag í síðustu viku því vélin var að verða eldsneytislaus. Vélin tók á loft frá Guwahati í Assam-ríki og var áfangastaðurinn Chennai í Tamil Nadu-ríki. Þar átti hún að lenda eftir þriggja klukkustunda flug.

Samkvæmt fréttum sumra indverskra fjölmiðla þá fékk flugstjórinn ekki heimild til að lenda í Chennai vegna mikillar flugumferðar um völlinn en aðrir miðlar halda því fram að slæmt veður hafi verið ástæðan.

En hvað sem því líður, þá var vélinn beint til Bengaluru í Karnataka-ríki. Sá flugvöllur er um 300 km frá Chennai.

Á leiðinni þangað sendi flugstjórinn út neyðarkall því eldsneytið var að verða búið. Fékk vélin forgang til lendingar í Bengaluru og lenti þar heilu og höldnu á áætluðum tíma. 168 farþegar voru um borð.

Eldsneyti var dælt á vélina í Bengaluru og var henni síðan flogið til Chennai.

Mikil umræða hefur verið um flugöryggismál í Indlandi síðustu vikur í kjölfar flugslyssins hörmulega í Ahmedabad fyrr í mánuðinu. Þá létust 270 manns, bæði á jörðu niðri og farþegar og áhöfn flugvélar frá Air India, þegar vélin hrapaði skömmu eftir flugtak.