Lásbogar, sverð, sveðjur, axir og veiðihnífar. Þetta eru nokkur af þeim 200 vopnum sem sérsveit lögreglunnar fann þegar hún gerði húsleit á nokkrum stöðum í Yorkshire, Derbyshire og Stafforshire á Englandi.

Þetta var í febrúar á síðasta ári og voru þrír menn handteknir í tengslum við aðgerðir lögreglunnar. Þetta eru þeir Brogan Stewart og Marco Pitzettu, sem eru báðir 25 ára, og Christopher Ringrose, 34 ára.

Sky News skýrir frá þessu og segir að þeir hafi verið fundnir sekir í síðustu viku um fjölda afbrota. Þar á meðal að hafa skipulagt hryðjuverkaárás á moskur, íslamskar menningarmiðstöðvar og bænahús gyðinga.

Aðgerðir lögreglunnar hófust eftir að henni bárust upplýsingar um að þremenningarnir væru að undirbúa sig undir það sem „þeir töldu vera óhjákvæmilegt kynþáttastríð.

Þeir höfðu orðið sér úti um rúmlega 200 vopn, þar á meðal næstum tilbúna hálfsjálfvirka skammbyssu en hún var þrívíddarprentuð.

Fyrir dómi sögðu þremenningarnir að þeir hefðu orðið sér úti um vopnin því þeir hafi verið að undirbúa sig undir innrás eða ástand þar sem uppvakningar herjuðu á fólk

En saksóknarar höfðu aðra sögu að segja og sögðu vopnin ætluð til notkunar í „kynþáttastríði“ og að mennirnir væru félagar í hópi á Internetinu, þar sem „nasistastjórnin væri lofsömuð“.

Fyrir dómi kom fram að þremenningarnir höfðu aldrei hist en þeir höfðu samt sem áður stofnað hóp á skilaboðaþjónustunni Telegram til að reyna að fá öfgamenn til liðs við sig. Lögreglumenn komust inn í þennan hóp. Talsmaður lögreglunnar segir að í hópnum hafi fólk látið í ljós aðdáun sína á fjöldamorðingjum og hafi viðrað mjög svo öfgasinnuð viðhorf gagnvart fólki sem líkist ekki meðlimum hópsins.