Sudiskha Konanki, tvítugur nemi við University of Pittsburgh, var í svokölluðu vorfríi (e. spring break) með fimm vinkonum í Punta Cana þegar hún hvarf.
Sjá einnig: Dularfullt mannshvarf – Hvað varð um hana?
Konanki sást síðast aðfaranótt fimmtudagsins 6. mars með ungum manni, Joshua Riibe, á ströndinni þar sem þau fengu sér meðal annars sundsprett. Þá sást hún í göngutúr með þessum sama manni á ströndinni en eftir það spurðist ekkert til hennar.
Joshua segir að hann hafi sofnað á bekk á ströndinni eftir að þau fóru í sjóinn og Sudiskha hafi haldið sína leið. Yfirvöld í Dóminíska lýðveldinu hafa lagt hald á vegabréf hans og er hann í farbanni á meðan málið er rannsakað.
Hann hefur neitað aðild að hvarfi hennar en engin ummerki um átök fundust á ströndinni þegar lögregla hóf rannsókn málsins. Tveimur tilgátum hefur verið varpað fram við rannsóknina; annars vegar að um slys hafi verið að ræða og hugsanlega hafi alda hrifsað hana með sér á haf út. Hins vegar að eitthvað saknæmt hafi átt sér stað.
Enginn er þó formlega undir grun í málinu þó augun beinist að Joshua þar sem hann sást með henni skömmu áður en hún hvarf.
NBC News hefur eftir talsmanni lögreglu, Diego Pesqueira, að foreldrar Konanki hafi farið fram á hún verði úrskurðuð látin.
