Hinn 29 ára gamli Kirill Tereshin stendur nú frammi fyrir þeim möguleika að missa báða handleggina. Tereshin, sem hefur verið kallaður hinn rússneski Stjáni blái, hefur í mörg ár sprautað efni sem kallast synthol í upphandleggsvöðvana.

Synthol er kokteill sem inniheldur olíu, eða einhvers konar sleipiefni, að stærstum hluta. Er markmiðið að láta vöðvana líta út fyrir að vera stærri án þess að auka raunverulegt vöðvamagn.

Eins og dæmin sanna getur þetta verið hættulegt og glímir Tereshin við alvarlega sýkingu í báðum handleggjum sem læknar eiga erfitt með að ráða við.

Í frétt News.com.au kemur fram að Tereshin hafi fengið þau skilaboð frá læknum að til að bjarga handleggjum hans þurfi hann að gangast undir húðígræðsluaðgerðir, en ekki hefur verið hægt að ráðast í þær þar sem Tereshin þykir of veikburða.

Tereshin hóf byrjaði að sprauta synthol í upphandleggi sína árið 2017 og var hann í kjölfarið kallaður Stjáni blái þar sem handleggir hans þóttu minna á handleggi teiknimyndapersónunnar.

Hann hefur þegar gengist undir skurðaðgerðir til að bjarga handleggjum sínum og þarf að gangast undir fleiri ef hann vill halda handleggjunum.