Táningsstúlka í Bandaríkjunum fór fram á það í vikunni að dómari dæmdi móður hennar til hámarksrefsingar fyrir kynferðisbrot sem stúlkan sagði að hafi eyðilag fjölskylduna. Dómarinn varð við því.

Móðirin er á fimmtugsaldri og heitir Leann Yammarino. Fjölskyldan bjó í Prairieville sem er úthverfi Baton-Rouge höfuðborgar Louisiana-ríkis. Hún var ákærð fyrir að hafa átt samræði við 14 ára gamlan bekkjarfélaga dóttur hennar og játaði hún verknaðinn. Þar að auki var hún sökuð um að hafa skipst á kynferðislegum skilaboðum við fimm aðra táningsstráka.

Yammarino kallaði sjálfa sig klappstýrumömmu (e. cheer mom) en hvort umrædd dóttir eða annað barn hennar var klappstýra liggur ekki fyrir en hún mun hafa stutt mjög við bakið á viðkomandi klappstýrusveit.

Þessi umrædda dóttir óskaði eftir því við dómsuppkvaðningu í vikunni að móðir hennar yrði dæmd til eins langrar fangelsisvistar og lög leyfðu. Dómarinn varð við því og dæmdi hana til hámarksrefsingar fyrir alla fimm ákæruliðina en þeir hljóðuðu upp á kynferðisbrot gegn barni og ósæmilega hegðun. Samtals dæmdi dómarinn Yammarino til 26 ára fangelsisvistar. Hún verður því um sjötugt þegar hún lýkur afplánun og verður að því loknu á skrá yfir kynferðisbrotamenn til æviloka.

Saksóknari segir hana enn hættulega þar sem þolendurnir hafi allir verið undir lögaldri.

Málið kom fyrst upp í júlí á síðasta ári. Þegar 14 ára drengurinn sem Yammarino átti samræði við leitaði til lögreglu. Eftir það gáfu sig fram 5 strákar á aldrinum 14-16 ára sem sögðu hana bæði hafa sent þeim kynferðisleg skilaboð og myndbönd af sjálfri sér.

Fram kemur í umfjöllun fjölmiðla vestanhafs að Yammarino hafi verið mjög niðurlút þegar dómurinn var kveðinn upp.