Trump og þau sem hann hefur tilnefnt til embætta í ríkisstjórn sinni kyrja í kór að það þurfi að frelsa Bandaríkin frá woke-hreyfingunni sem hafi náð heljartökum á háskólum landsins og menntafólki á síðustu árum og beint sjónunum að mismunun og að sérstakt tillit sé tekið allra minnihlutahópa.
Í umfjöllun Jótlandspóstsins um málið er þeirri spurningu velt upp hvað þetta þýði í raun og veru? Getur uppgjör við pólitíska rétthugsun endað sem ógn við tjáningarfrelsið sem Trump segist vera að verja?
Trump hefur falið auðmönnunum Elon Musk og Vivek Ramaswamy að finna hvar er hægt að skera niður í opinberum útgjöldum. Þeir hafa ekki farið leynt með skoðun sína á woke, Musk hefur sagt woke-hugtakið vera andlega veiru en Ramaswamy segir þetta vera svik innan samfélagslegs réttlætis.
Sömu tónar heyrast frá Pete Hegseth og Kash Patel, sem Trump hefur tilnefnt sem varnarmálaráðherra og yfirmann FBI. Þeir hafa báðir lofað að reka starfsfólk sem er fylgjandi jákvæðri mismunum minnihlutahópa og það starfsfólk sem er ekki sammála pólitískri stefnu Trump.
Trump og hans fólk vísar því á bug að þetta sé hluti af því að koma upp hugsanlögreglu einræðisstjórnar í landi þar sem víðtækt tjáningarfrelsi er tryggt í stjórnarskránni.
Þeir segja að um uppgjör við vinstrisinnaða innrætingu í skólum sé að ræða. Þeir saka woke-hreyfinguna um að hafa gengið allt of langt með áherslum sínum á réttindi transfólks og annarra minnihlutahópa.
