Þegar bresk hjón fóru með vasa, sem þau áttu, í sjónvarpsþáttinn Going for a Song, sem er talinn forveri Antiques Roadshow sem margir þekkja eflaust, á áttunda áratugnum sagði sérfræðingur þáttarins þeim að vasinn væri lítils virði, eða sem svarar til um 150.000 íslenskra króna. En annað kom á daginn.

Vasinn er kínverskur og frá tímum Qing ættarinnar á miðri sautjándu öld. Hann er úr postulíni.

Eftir þetta verðmat endaði vasinn uppi á háalofti þar sem hann safnaði ryki þar til hjónin létust og erfingjar þeirra rákust á hann. Þeir fóru með hann til Bainbridges uppboðshússins þar sem sérfræðingar sáu öllu meiri verðmæti í honum.

Þeir mátu hann á sem svarar til 170 milljóna íslenskra króna.

En þegar uppboðið fór fram, upphófst mikill slagur um vasann og endaði hæsta boðið í 53 milljónum punda, sem svarar til um 9 milljarða króna. Kaupandinn nýtur nafnleyndar.