Nýtt og kannski undarlegt trend hefur herjað á kínverska samfélagsmiðla að undanförnu. Það eru ungar konur sem láta taka óléttumyndir af sér þótt þær séu ekki óléttar. Þær stilla sér upp með óléttumaga úr silíkoni og birta myndirnar síðan á samfélagsmiðlum.

OddityCentral skýrir frá þessu og segir að ástæðan fyrir þessu sé að konurnar vilji eignast minningar um óléttuna en um leið séu þær grannar og unglegar í útliti.

Áður fyrr þótti það skammarlegt að vera einhleyp og ólétt en ungar konur í dag ganga svo langt að setja óléttu á svið, jafnvel þótt þær séu ekki í sambandi. Markmiðið er einfaldlega að búa til minningar fyrir framtíðina, þegar líkaminn hefur kannski breyst.

Trendið komst í hámæli eftir að vinsæll áhrifavaldur deildi myndum af sér. Það var í október sem Meizi Gege, áhrifavaldur frá Hunan-héraðinu, deildi óléttumyndum af sér með tæpum 6 milljónum fylgjenda sinna. Hún sagðist hafa látið taka myndirnar á meðan hún var enn grönn. Myndirnar sýna unglega útgeislun hennar og líkamsvöxt. Þetta hafði mikil áhrif á marga af fylgjendum hennar.