Niðurstöður nýrrar rannsóknar gefa til kynna að það geti verið skaðlegt fyrir andlega heilsu barna undir 13 ára aldri að nota snjallsíma og samfélagsmiðla.

Greint er frá þessu á heilsuvef CNN. Í rannsókninni fundust tengsl milli snjallsímanotkunar hjá börnum í þessum aldurshópi og sjálfsvígshugsana, verri stjórnar á tilfinningum, minna sjálfsálits og minni tengsla við veruleikann. Á þetta sérstaklega við um stúlkur.

Börn yngri en 13 ára sem notuðu snjallsíma fóru meira inn á samfélagsmiðla, urðu frekar fyrir svefntruflunum, neteinelti og notkunin bitnaði á samskiptum við fjölskyldumeðlimi.

Rannsóknin var yfirgripsmikil en hún byggði á gögnum frá þátttakendum sjálfum en um 2 milljónir einstaklinga í 163 löndum tóku þátt. Gögnin voru ekki sannreynd af rannsakendunum.

Það voru samtökin Sapien Labs sem stóðu fyrir rannsókninni en stofnandi þeirra, Tara Thiagarajan, leiddi rannsóknina en hún segir niðurstöðurnar svo sláandi að nauðsynlegt sé að takmarka notkun barna yngri en 13 ára á snjallsímum, á heimsvísu.

Aðrir vísindamenn hafa mælt með því að ganga lengra og sjá til þess að börn byrji ekki að nota samfélagsmiðla fyrr en þau ná 16 ára aldri þar sem rannsóknir sýni fram á að notkunin ýti meðal annars undir kvíða og minna sjálfstraust hjá börnum. Þótt slíkt væri erfitt í framkvæmd mæla vísindamennirnir með samhentu átaki foreldra til að auka líkurnar á að þetta takist.

Umfjöllun CNN í heild sinni er hægt að lesa hér.