Það var á góðviðrisdegi að fimm ára stúlka var að leika sér úti í garði heima hjá sér á meðan móðir hennar sýslaði eitt og annað innanhúss. Síðan kom stúlkan inn og sýndi móður sinni blátt merki á öðrum fætinum. Þetta leit út eins og marblettur og taldi móðirin að stúlkan hefði dottið og meitt sig. En síðan varð bletturinn svartur og húðin við hann fór að rotna.

Foreldrar stúlkunnar, sem heitir Kailyn Donovan, ákváðu þá að fara með hana til læknis þar sem greinilegt var að ekki var um marblett að ræða eins og þau höfðu talið í fyrstu. Fjölskyldan býr í Mendon í Massachusetts í Bandaríkjunum. Foreldrarnir fóru með Kailyn á UMass Memorial sjúkrahúsið. Þar var hún skoðuð af sérfræðingi í smitsjúkdómalækningum. Hann sá strax að um köngulóarbit var að ræða. Kailyn hafði verið bitin af svartri ekkju, alræmdri eitraðri köngulóartegund.

Þegar köngulær af þessari tegund bíta fólk þá sprauta þær eitri sínu í húðina. Eitrið drepur síðan húðina og því fór hún að rotna. Sem betur fer brugðust foreldrar Kailyn fljótt við og því var hægt að gefa Kailyn móteitur og hún mun jafna sig að fullu.

CBS hefur eftir Kristine Donovan, móður Kailyn, að Kailyn hafi ekki tekið eftir því þegar köngulóin beit hana. Hugsanlega hafi hún leynst í buxunum hennar en það sé ekki vitað.

Svartar ekkjur eiga heimkynni í flestum ríkjum Bandaríkjanna en sem betur fer er þeim meinilla við fólk og halda sig að jafnaði fjarri því. Það er því mjög sjaldgæft að þær bíti fólk.