Með tímamótadómi Evrópudómstólsins hefur hann slegið því föstu að sala maltneskra yfirvalda á „gullvegabréfum“ sé brot á lögum Evrópusambandsins. Margir rússneskir auðmenn, sem ESB hefur beitt refsiaðgerðum, og dæmdir glæpamenn hafa greiðan aðgang að ESB með þessum vegabréfum.

Rússnesku auðmennirnir og dæmdir glæpamenn geta farið ferða sinna innan ESB, þökk sé „gullvegabréfum“ frá Möltu en þarlend yfirvöld hafa mokað milljörðum inn á síðustu árum með því að selja þessi vegabréf.

En nú hefur Evrópudómstóllinn stöðvað þetta og þar með verða maltnesk yfirvöld að hætta sölu á ríkisborgararétti til útlendinga. Þeir sem hafa keypt sér ríkisborgararétt hafa þar með tryggt sér ævilangt dvalarleyfi á Möltu eða í öðrum ESB-ríkjum.

Með maltnesku vegabréfi fylgir ríkisborgararéttur í ESB með öllum þeim réttindum og kostum sem fylgir. Rússar og fólk frá öðrum ríkum, sem hefur keypt sér maltneskt vegabréf, getur því búið og starfað hvar sem er í ESB og hefur kosningarétt.

Það var ekki á allra færi að kaupa sér maltneskt vegabréf því kaupandinn þurfti að sýna fram á fjárfestingu upp á að minnsta kosti 600.000 evrur á Möltu, til dæmis í fasteignum.

Maltneska ríkisstjórnin hefur nú þegar tilkynnt að hún muni hlýta dómsniðurstöðunni og hætta sölu á ríkisborgararétti. En seld vegabréf verða ekki innkölluð og því munu rússnesku auðmennirnir og aðrir, sem keyptu vegabréf, geta farið frjálsir ferða sinna um ESB.