KAPP og Loðnuvinnslan skrifuðu undir viljayfirlýsingu á Sjávarútvegssýningunni í Barcelona í dag þess efnis að ganga til samninga um nýja uppsjávarvinnslu á Fáskrúðsfirði. Lausnin inniheldur bæði vél- og hugbúnað fyrir flokkun, flökun og kælingu ásamt uppsetningu. Samkvæmt félögunum er útfærsla lausnarinnar vel á veg komin og aðeins um loka frágang að ræða. Félögin stefna á að klára formlega samninga fyrir næstu mánaðarmót. 

Ólafur Karl Sigurðarson, aðstoðarforstjóri KAPP og framkvæmdastjóri KAPP Skagans, segist afar ánægður með það traust sem Loðnuvinnslan sýnir félaginu. ,,Við erum þakklátir traustinu sem Garðar og teymi Loðnuvinnslunar sýnir okkur með að ganga til samninga við okkur. Það hefur ríkt sterkt viðskiptasamband milli félaganna og okkur hlakkar til að halda því áfram. Eins er reglulega gaman að því að lausnin sem við bjóðum nær þvert á vöruframboð okkar hjá KAPP og KAPP Skaganum, sem sýnir gott vöruframboð okkar.” 

KAPP sérhæfir sig í hönnun og framleiðslu á ýmsum tækjabúnaði fyrir sjávarútveginn, fiskeldi og annan iðnað sem og þjónustu og sölu.

Garðar Sigvaldason, framkvæmdastjóri Loðnuvinnslunnar, segir KAPP sýna mikinn styrk með þessari viljayfirlýsingu. ,,Það er sannarlega ánægjulegt að sjáum fram á að landa samkomulagi við Kapp og Kapp Skagann um frekari uppbyggingu á Fáskrúðsfirði. Starfsmenn Kapp og Skaganns hafa í gegnum árin reynst okkur vel sem bandamenn í uppbyggingu félagsins og sýnt að þeir eru traustsins verðir. Endurreist félag er samkeppnishæft á hörðum markaði og þar innandyra er valinn maður í hverju rúmi.”

Loðnuvinnslan rekur fiskimjölsverksmiðju, frystihús, síldarsöltun og gerir út ísfisktogarann Ljósafell, uppsjávarskipið Hoffell og línubátinn Sandfell.