Ofurfyrirsætunni Naomi Campbell hefur verið bannað að sinna störfum fyrir góðgerðasamtök næstu fimm árin. Ástæðan er að hún misnotaði trúnaðarstöðu sína hjá góðgerðasamtökunum Fashion for Relief mjög gróflega.

USA Today er meðal þeirra miðla sem skýra frá þessu.

Meðal þess sem breska eftirlitsstofnunin Charity Commision gagnrýnir við störf Fashion fro Relief er að samtökin notuðu aðeins 8,5%, af því fé sem safnaðist, til góðgerðarmála. Þess utan er stjórnun samtakanna sögð hafa verið slæm og að lítil sem engin stjórn hafi verið á fjármálum þeirra.

En það sem gerði útslagið í máli Campbell var að hún hafði farið ansi frjálslega með peninga samtakanna í stað þess að láta þurfandi njóta þeirra.

Meðal útgjalda samtakanna fyrir Campbell var að greitt var fyrir gistingu á fimm stjörnu hóteli í Cannes þegar kvikmyndahátíðin fræga fór þar fram. Þess utan greiddu samtökin fyrir dýrar baðferðir hennar, herbergisþjónustu og sígarettur.

Campbell hefur ekki tjáð sig um málið.