Í nýrri skýrslu frá sameiningarráðuneyti Suður-Kóreu kemur fram að 22 ára Norður-kóreumaður hafi verið tekinn af lífi fyrir að hafa horft á og deilt suðurkóreskum kvikmyndum og tónlist. Fór aftaka hans fram opinberlega.
Skýrslan er byggð á frásögnum 649 landflótta Norður-Kóreumanna.
Maðurinn er sagður hafa verið tekinn af lífi eftir að hafa hlustað á 70 suðurkóresk lög og fyrir að hafa horft á þrjár suðurkóreskar kvikmyndir. Hann deildi þessu síðan með öðrum.
Í skýrslunni er því lýst hvernig einræðisstjórnin reynir að hafa stjórn á flæði upplýsinga frá útlöndum og beinir hún sjónum sínum sérstaklega að ungu fólki.
