Magnað atvik náðist á myndband í gær þegar hvalur hvolfdi litlum fiskveiðibáti úti fyrir ströndum New Hampshire í Bandaríkjunum í gær. Tveir menn voru um borð í bátnum og slösuðust þeir sem betur fer ekki og þá virðist hvalnum ekki hafa orðið meint af.

Það var mönnunum sennilega til happs að skammt frá var annar bátur með tveimur ungum mönnum í sem voru við veiðar. Tókst þeim að draga mennina á þurrt og hafa samband við bandarísku strandgæsluna sem kom á vettvang skömmu síðar. Voru mennirnir aðeins í sjónum í um eina mínútu áður en þeim var bjargað. Fulltrúum strandgæslunnar tókst svo að koma í veg fyrir að báturinn sykki.

Myndband af atvikinu má sjá hér að neðan.