Zoe Rider og Nicola Lethbridge voru í síðustu viku dæmdar í ævilangt fangelsi, fyrir að hafa í sameiningu ráðist á hinn sextuga Stephen Koczyczarski á heimili hans í Sheffield á síðasta ári. Þær veittu honum 22 áverka eftir að hafa ranglega sakað hann um að vera barnaníðingur. Þær eiga í fyrsta lagi möguleika á reynslulausn eftir 26 ár.

Zoe er 36 ára og Nicola er 45 ára. Stephen var nágranni þeirra. Sky News segir að fyrir dómi hafi komið fram að þær hafi tekið árásina á hann upp.

Þær rændu hann og skildu hann eftir blæðandi úr andliti, höfði og líkama. Hann lést af völdum áverka sinna tveimur dögum síðar.

Auk ævilanga fangelsisins fyrir morðið á Stephen voru þær dæmdar í 13 ára fangelsi fyrir rán.

Við dómsuppkvaðninguna sagði dómarinn að þær hafi greinilega verið undir áhrifum eiturlyfja og líklega áfengis þegar þær réðust á Stephen. Það leiki enginn vafi á að þær hafi farið inn til Stephen til að ræna hann til að geta fjármagnað fíkniefnaneyslu sína.

Þær hafi í sameiningu veist að honum á hrottalegan hátt og miskunnarlausan hátt. Hafi berað kynfæri hans, hótað að limlesta hann og hrópað ókvæðisorð að honum.