Vísindamenn hafa þróað silkiefni sem getur dregið svo mikið úr hljóði að það er hægt að nota það til að hljóðeinangra svæði á heimilum, fyrirtækjum og annars staðar.

Live Science skýrir frá þessu og segir að efnið geti búið til hljóðbylgjur sem trufla hljóðbylgjur, sem mynda hávaða, eða með því að loka á titring sem er lykillinn að flutningi hljóðs.

Efnið inniheldur efni sem er ofið í gegnum silkið. Þetta efni framleiðir rafmerki þegar efnið aflagast og bregst efnið þá við með örlitlum hreyfingum á borð við þær sem verða þegar hljóðbylgjur myndast.

Efnið er örlítið þykkara en ummál mannshárs og getur haldið aftur af hljóði á tvennan hátt að því er segir í tilkynningu frá MIT.

Fyrst er rafmerkjum breytt í vélrænar hreyfingar sem gera að verkum að silkið titrar og býr til sínar eigin hljóðbylgjur. Þær sveiflast úr takti við óæskilegar hljóðbylgjur og kæfa þær þannig. Þetta er sama virkni og í heyrnartólum sem kæfa hljóð.