Yfirvöld í Dubaí í Sameinuðu arabísku furstadæmunum hafa hvatt ferðamenn til að halda sig fjarri flugvelli borgarinnar vegna gríðarlegrar úrkomu sem gert hefur íbúum og ferðamönnum lífið leitt. Úrkoma sem venjulega fellur á um átján mánuðum féll á nokkum klukkustundum í gær.

Á samfélagsmiðlum hafa birst myndir af bílum, fokdýrum lúxuskerrum meðal annars, á kafi í vatni og eru dæmi um ökumenn sem þurftu að komast í skjól syndandi.

Ástandið er einmitt einna verst í nágrenni flugvallarins þar sem allt er á kafi í vatni og hefur mörgum flugferðum verið aflýst. Þá flæddi vatn inn í mörg hús og þurftu íbúar að leita skjóls annars staðar.

„Við hvetjum þig til að koma EKKI á flugvöllinn nema það sé algjörlega nauðsynlegt. Flugferðum hefur verið seinkað eða aflýst. Athugaðu stöðuna á flugi hjá þínu flugfélagi. Við vinnum hörðum höndum að því að koma starfseminni í samt horf í mjög krefjandi aðstæðum,“ sagði í tilkynningu á heimasíðu alþjóðaflugvallarins í Dúbaí.

Það byrjaði að rigna síðdegis á mánudag og náði úrkoman hámarki í gærmorgun. Á aðeins 24 klukkustundum féllu rúmir 140 millimetrar en ársúrkoma í Dúbaí er að meðaltali 94 millimetrar.

Á vef Daily Mail kemur fram að í morgunsárið hafi vinna hafist við hreinsun og að dæla vatni af götum. Engar fréttir hafa borist af manntjóni.