Eins og DV greindi frá í gær lést lögreglumaður í bænum Kalgoorlie í Ástralíu, 29 ára að aldri, eftir að hann datt í sinni eigin trúlofunarveislu með þeim afleiðingum að slagæð í hálsi hans skarst og hann lést. Þessi harmleikur hefur nú undið enn frekar upp á sig en unnusta mannsins hefur greint frá því að hún gangi með barn þeirra.
Unnustan sem hafði ekki verið nafngreind heitir Lily Watts en unnusti hennar heitinn hét Liam Trimmer. Fram kemur í umfjöllun New York Post að staðið hafi til að tilkynna í trúlofunarveislunni að Watts væri komin 14 vikur á leið en ekkert hafi orðið úr því þegar harmleikurinn dundi yfir.
Fjáröflun hefur verið sett af stað á vefsíðunni GoFundme.com fyrir Watts og ófætt barn hennar og Trimmer sem mun aldrei kynnast föður sínum. Vinkona Watts segir að dauði Trimmer hafi skilið eftir tóm í lífi hennar sem aldrei verði hægt að fylla.
Watts starfar sem hjúkrunarfræðingur og segir að unnusti hennar hafi verið afar spenntur fyrir föðurhlutverkinu. Hún segir að hann hafi verið stóra ástin í lífi sínu og sorgin sé yfirþyrmandi. Hún muni sjá til þess að barnið þeirra fái að vita hvaða mann hann hafi haft að geyma.
Watts tók þátt í tilraunum til að bjarga lífi unnusta síns og segir að allt hafi verið gert til að reyna að bjarga honum en án árangurs.
Enn er ekki vitað hvernig slysið bar nákvæmlega að en það er til rannsóknar.
