Eftir að einræðisherranum Bassar al-Assad var steypt af stóli í Sýrlandi héldu almenningur og fjölmiðlamenn þegar í forsetahöllina í Damaskus og þá kom strax í ljós að hann lifði í vellystingum á meðan borgarastyrjöld geisaði í landinu, fjöldi manna flúði land og fjöldi fólks var fangelsað og pyntað. Forsetahöllin var þó ekki raunverulegt heimili fjölskyldu einræðisherrans. Nú hefur það hús einnig verið opnað og þar hafa m.a. fundist gögn sem sýna hversu auðug eiginkona Assad, Asma er.

Breskir fjölmiðlar hafa sýnt Asma al-Assad mikinn áhuga en hún er fædd og uppalin í Bretlandi en foreldrar hennar fluttu til landsins frá Sýrlandi.

Dominic Waghorn fréttamaður Sky News er meðal þeirra sem skoðað hafa heimili hjónanna og barna þeirra en fjölskyldan bjó í veglegu einbýlishúsi í fínasta hverfi Damaskus.

Þegar var búið að stela miklu en fjölskyldan hafði greinilega yfirgefið heimilið í flýti og skilið megnið af því sem var þar eftir. Hins vegar sá Waghorn fjölda kassa utan af skartgripum, forngripum og hönnunarvörum.

Á neðri hæð hússins fundust ýmis skjöl þar á meðal yfirlit yfir bankainnistæður í eigu Asma en hún notaði ættarnafn sitt en ekki eftirnafn eiginmanns síns á bankareikningum sínum. Á yfirlitunum mátti sjá innistæður sem voru annars vegar hálf milljón evra (um 73 milljónir íslenskra króna) og annars vegar 22,5 milljónir dollara (3,1 milljarður íslenskra króna).

Ekkert miðstéttarlíf

Asma hafði áður fullyrt að fjölskyldan lifði ósköp venjulegu miðstéttarlífi en það sem fannst á heimilinu sýnir að það var ekki sannleikanum samkvæmt.

Einnig fundust annars konar verðmæti í húsinu, þ.e.a.s. tilfinningaleg. Þar má nefna gjafir sem 3 börn hjónanna höfðu búið til fyrir móður sína, fjölskyldumyndir þar sem sjá mátti m.a. einræðisherrann synda og myndir frá brúðkaupsdegi hjónanna.

Talið er líklegt að þessar háu fjárhæðir sem sjá mátti að Asma á í banka séu afurð svika af hálfu hennar og eiginmannsins en það er óljóst hvar þeir miklu fjármunir sem þau hafa sankað að sér eru niðurkomnir.