Pólsk hjón gengu í það heilaga í heimalandi sínu í ágúst 2022. Þremur vikum síðar fóru þau í brúðkaupsferð til Miami í Bandaríkjunum. Þar fundust þau meðvitundarlaus á götum úti en ekki tókst að bjarga lífi eiginkonunnar. Bandarísk yfirvöld töldu að hjónunum hefði verið byrlað ólyfjan en nú hafa pólsk yfirvöld komist að þveröfugri niðurstöðu.

Konan hét Aleksandra Leczycka og var 26 ára þegar hún lést en maður hennar, sem eins og áður segir lifði af, heitir Dawid Leczycki.

Þau giftu sig í borginni Siedlce í Póllandi. Þremur vikum síðar fundust þau meðvitundarlaus úti á götu í Miami og hafði bæði peningum og skartgripum verið stolið af þeim. Lögregla í Bandaríkjunum gerði ráð fyrir því að hjónunum hefði verið byrlað og þau síðan rænd.

Pólsk yfirvöld tóku málið hins vegar til rannsóknar og er niðurstaða hennar að hjónin hafi tekið inn hugbreytandi efni af fúsum og frjálsum vilja. Talið er að annað hvort hafi verið um of stóran skammt að ræða eða ofnæmisviðbrögð.

Aleksandra birti myndir úr brúðkaupsferðinni á samfélagsmiðlum aðeins nokkrum klukkustundum áður en hún lést.

Í tilkynningu pólskra yfirvalda segir að sönnunargögn sem bandarísk yfirvöld hafi látið af hendi hafi verið rannsökuð. Þar sé um að ræða meðal annars gögn úr snjalltækjum og niðurstöður rannsókna á efnum sem fundust í líkömum hjónanna. Þessi gögn bendi til þess að þau hafi tekið efnið, en ekki kemur fram um hvaða efni var nákvæmlega að ræða, inn af sjálfsdáðum. Það sé ekki útilokað að þeim hafi verið byrlað en það sé ekkert í sönnunargögnunum sem bendi til þess.

Mirror greindi frá.