Janja ræddi þar meðal annars um samfélagsmiðla og nauðsyn þess að setja skýrt regluverk utan um starfsemi þeirra, meðal annars til stemma stigu við dreifingu falsfrétta.
Elon Musk er eins og kunnugt er eigandi X, áður Twitter, en fyrirtæki hans stóð í harðvítugum deilum við brasilísk yfirvöld fyrr á þessu ári þar sem fyrirtækið átti ekki opinberan fulltrúa í landinu. Þá hafi hann hunsað fyrirskipun hæstaréttar landsins um að loka á reikninga sem dreifa falsfréttum og fölskum upplýsingum.
Af þessum sökum var lokað á samfélagsmiðilinn í landinu í um einn mánuð.
Janja beindi orðum sínum beint að Musk þegar hún talaði um regluverkið. „Ég held að það sé Elon Musk. Ég er ekki hrædd við þig, fokkaðu þér, Elon Musk.”
Í frétt CNN kemur fram að orð Janja hafi verið sögð í gríni eða kaldhæðni og brást Musk sjálfur við á samfélagsmiðli sínum. Í athugasemd við myndband af ræðu hennar birti hann hláturtjákn og í annarri færslu sagði hann að Janja og eiginmaður hennar, Lula da Silva, muni tapa næstu forsetakosningum.
